ტრანსფერი აეროპორტში და სასტუმროში
ტრანსფერულად ითვლება მგზავრი, თუ ის თბილისის საერთაშორისო აეროპორტის გავლით მიემგზავრება სხვა მიმართულებით, იმავე, ან სხვა ავიაგადამზიდის საშუალებით, შესაბამისად, ამ დროს რეისის ნომერიც შეიცვლება.
თბილისის აეროპორტში ტრანსფერული მგზავრის კუთვნილი ბარგისთვის გამოყოფილია სპეციალური საცავი, სადაც რეგისტრაციამდე ინახება ტრანსფერული მგზავრის ბარგი.
მგზავრს არ დასჭირდება ბარგის ხელმეორედ რეგისტრაცია, თუ ბარგი გაფორმებულია გამგზავრების აეროპორტიდან საბოლოო დანიშნულების აეროპორტამდე. თუ თბილისის აეროპორტს წინასწარ აქვს ინფორმაცია ტრანსფერული მგზავრის შესახებ, მაშინ მგზავრი, საზღვრის გადაკვეთის გარეშე, მგზავრთა გადაზიდვების აგენტის დახმარებით, შესაძლებელია, მოხვდეს სატრანზიტო / ნეიტრალურ ზონაში, ისარგებლოს სხვადასხვა მომსახურებით (კაფე-ბარები, მაღაზიები ...) და უსაფრთხოების კონტროლის პროცედურების გავლის შემდეგ, მოემზადოს ჩასხდომისთვის.
ტრანზიტულად ითვლება მგზავრი, თუ ის თბილისის საერთაშორისო აეროპორტის გავლით მიემგზავრება სხვა მიმართულებით, იმავე ავიაგადამზიდის საშუალებით; ამ დროს არ იცვლება რეისის ნომერი. ტრანზიტულად მგზავრობისას, მგზავრი და მისი კუთვნილი ბარგი თვითმფრინავიდან გადმოსვლის / გადმოტვირთვის გარეშე აგრძელებენ გზას სხვა მიმართულებით.
თუ ტრანზიტულ აეროპორტში გაჩერების დრო საკმარისია, მაშინ, შესაძლოა, მგზავრებს დაურიგდეთ ტრანზიტული ჩასხდომის ბარათები და, სატრანზიტო / ნეიტრალურ ზონაში შესვლისას, ისინი ისარგებლებენ აეროპორტის სხვადასხვა მომსახურებით (კაფე-ბარები, მაღაზიები) და უსაფრთხოების კონტროლის პროცედურების გავლის შემდეგ, დაბრუნდებიან თვითმფრინავში.